Шу ауданының Мұқағали Мақатаев атындағы мектеп базасында оқушыларға арналған «Өмір таңдауы», «Мақсатқа жету жолы», «Сенің болашағың» тақырыптарында мотивациялық ойын-тренингтер өткізілді. Іс-шараның мақсаты – жасөспірімдердің өмірлік ұстанымдарын қалыптастыру, болашаққа деген сенімін арттыру, өз мүмкіндіктерін дұрыс бағалауға үйрету және алға қойған мақсаттарына жетуге ынталандыру болды.
Аталған іс-шара Шу ауданы әкімдігінің ішкі саясат бөлімі КММ тапсырыс аясында «Жамбыл облысы жастар ұйымдарының Қауымдастығы» заңды тұлғалар бірлестігі ұйымдастыруымен өткізілді.
Іс-шараға арнайы қатысқан әдіскер-психолог Раимбекова Тамара Пралиевна және “Sunqar” волонтерлық қозғалысының негізін қалаушы, кіші гранттар жеңімпазы, жастар көшбасшысы Еркін Әбдиев.
Тренинг барысында қатысушылар өмірдегі маңызды шешімдерді қабылдау, жеке жауапкершілікті сезіну, уақытты тиімді пайдалану және өз болашағын жоспарлау мәселелері бойынша ақпарат алды. «Өмір таңдауы» ойыны арқылы оқушылар әртүрлі өмірлік жағдайларды талдап, дұрыс таңдау жасаудың маңыздылығын түсінді. Сонымен қатар, адамның болашақтағы жетістігі оның бүгінгі таңдаған бағыты мен әрекетіне байланысты екендігі айтылды.
«Мақсатқа жету жолы» атты тренингте оқушылар өз армандары мен мақсаттарын анықтап, оларға жетудің кезеңдерін жоспарлады. Арнайы тапсырмалар мен топтық жұмыстар арқылы қатысушылар мақсат қоюдың тиімді әдістерін меңгеріп, табысқа жету үшін табандылық, еңбекқорлық және өзіне деген сенімнің маңызын түсінді. Әр оқушы өз болашағына қатысты ойларын ортаға салып, жеке даму жоспарын құруға мүмкіндік алды.
Ал «Сенің болашағың» тақырыбындағы бөлімде оқушылардың кәсіби бағдарлануына, мамандық таңдаудағы жауапкершілігіне және тұлғалық дамуына ерекше назар аударылды. Қатысушылар өз қызығушылықтары мен қабілеттерін анықтауға арналған жаттығулар орындап, болашақта қандай жетістіктерге қол жеткізгісі келетінін талқылады. Тренинг барысында жастарға өмірде кездесетін қиындықтарды жеңу жолдары мен өз әлеуетін толық жүзеге асырудың маңыздылығы түсіндірілді.
Іс-шара барысында түрлі психологиялық ойындар, пікірталастар және шығармашылық тапсырмалар ұйымдастырылып, оқушылар белсенділік танытты. Олар өзара тәжірибе алмасып, болашаққа қатысты көзқарастарын ортаға салды. Тренинг жастардың көшбасшылық қасиеттерін дамытуға, коммуникативтік дағдыларын жетілдіруге және өз күшіне деген сенімін арттыруға ықпал етті.
Мотивациялық ойын-тренингтер оқушыларға жаңа серпін беріп, өз мақсаттарын айқындауға және болашаққа нық қадам жасауға бағытталған маңызды тәрбиелік іс-шара болды. Қатысушылар кездесуден пайдалы ақпарат алып, өз өмірлерін жоспарлау мен табысқа жету жолында жаңа ой түйді. Мұндай іс-шаралар жастардың тұлғалық дамуына оң әсерін тигізіп, олардың белсенді әрі жауапты азамат болып қалыптасуына ықпал етеді.
