2026 жылғы 4–5 қараша күндері Сарысу ауданының орталық мешіті жанындағы медреседе аудан имамдарының қатысуымен 16 сағаттық семинар өткізілді.
Аталған семинардың негізгі мақсаты – діни қызметкерлердің кәсіби біліктілігі мен діни сауаттылығын арттыру, діни саладағы өзекті мәселелер бойынша білімдерін жетілдіру, дәстүрлі діни құндылықтарды насихаттау, сондай-ақ қоғамда діни тұрақтылық пен конфессияаралық келісімді нығайту.
Екі күнге жоспарланған семинарға арнайы спикер ретінде дінтанушы, Қазақстан мұсылмандары діни басқармасының (ҚМДБ) Ақпараттық-насихат тобының мүшесі Қанат Жұмағұл шақырылды. Семинар барысында спикер қатысушыларға қазіргі қоғамдағы діни ахуал, діни сауаттылықтың маңыздылығы және дін қызметкерлерінің қоғам алдындағы жауапкершілігі жөнінде кеңінен ақпарат берді.
Алғашқы күнгі семинар аясында дәстүрлі ислам құндылықтары, ұлттық салт-дәстүр мен діннің сабақтастығы, діни таным мен рухани тәрбиенің қоғам өміріндегі орны қарастырылды. Сонымен қатар қазіргі ақпараттық кеңістікте таралып жатқан діни мазмұндағы ақпараттарды саралау, шынайы діни дереккөздерді ажырату және күмәнді ақпараттарға сыни көзқараспен қарау мәселелеріне ерекше назар аударылды. Спикер діни ақпаратты қабылдау мен таратудың жауапкершілігіне тоқталып, дін қызметкерлерінің халық арасында түсіндіру жұмыстарын жүргізудегі рөлін атап өтті.
Семинардың екінші күнінде діни экстремизм мен радикалды идеологиялардың алдын алу, деструктивті діни ағымдардың қоғамға тигізетін кері әсері және олардың ықпалына қарсы профилактикалық жұмыстарды ұйымдастыру мәселелері талқыланды. Қатысушыларға жастар арасында діни сауаттылықты қалыптастыру, теріс діни көзқарастардың алдын алу, тұрғындармен тиімді қарым-қатынас орнату және қоғамда дұрыс діни түсінік қалыптастыру бағыттары бойынша маңызды мәліметтер ұсынылды.
Сондай-ақ дін қызметкерлерінің халықпен жұмыс жүргізу барысында туындайтын өзекті мәселелерге назар аударылып, діни сұрақтарға сауатты әрі түсінікті жауап беру, ақпараттық-түсіндіру жұмыстарының мазмұнын жетілдіру және тұрғындармен тұрақты байланыс орнату жолдары сөз болды. Дін саласындағы профилактикалық жұмыстарды жүйелі жүргізудің маңыздылығы атап өтілді.
Іс-шара барысында қатысушылар спикермен еркін пікір алмасып, өздерін толғандырған сұрақтарын қойды. Қанат Жұмағұл тарапынан қойылған сұрақтарға жан-жақты жауаптар беріліп, тәжірибелік тұрғыда маңызды түсіндірмелер ұсынылды. Сонымен қатар аудан имамдарының күнделікті қызмет барысында кездесетін мәселелері талқыланып, оларды шешу жолдары бойынша өзара тәжірибе алмасу мүмкіндігі қалыптасты.
16 сағатқа созылған семинар қорытындысы бойынша қатысушылар діни саладағы өзекті мәселелер жөнінде білімдерін толықтырып, ақпараттық-түсіндіру жұмыстарын жүргізудің маңыздылығы мен тиімді тәсілдері туралы пайдалы мәліметтер алды.
Аталған семинар дін қызметкерлерінің біліктілігін арттыруға, діни сауаттылықты нығайтуға, дәстүрлі діни құндылықтарды дәріптеуге және қоғамдағы рухани тұрақтылықты сақтауға бағытталған маңызды іс-шаралардың бірі болды.