2026 жылғы 2 қазан күні сағат 12:00-де Шоқан Уәлиханов атындағы мектеп-гимназиясында «Білім беру ұйымдарында ата-аналармен түсіндіру және оңалту шараларын ұйымдастыру» тақырыбында профилактикалық кездесу ұйымдастырылды.
Іс-шараның негізгі мақсаты – білім беру ұйымдарында зайырлылық қағидаттарын сақтау, ата-аналардың құқықтық және діни сауаттылығын арттыру, оқу орындарында белгіленген зайырлы талаптарды орындаудың маңыздылығын түсіндіру, сондай-ақ ата-аналармен жүйелі профилактикалық және оңалту жұмыстарын жүргізу.
Кездесуге спикер ретінде дінтанушы, Қазақстан мұсылмандары діни басқармасының (ҚМДБ) ақпараттық-насихат тобының мүшесі Қанат Жұмағұл қатысты.
Іс-шара барысында білім беру ұйымдарындағы зайырлылық қағидаттары, ата-аналардың бала тәрбиесіндегі жауапкершілігі және білім беру ортасында белгіленген талаптарды сақтау мәселелері кеңінен талқыланды. Спикер зайырлы білім беру жүйесінің ерекшеліктерін түсіндіріп, мектептің барлық білім алушылар үшін тең құқықтар мен мүмкіндіктерді қамтамасыз ететін орта ретіндегі маңыздылығына тоқталды.
Сонымен қатар, ата-аналарға Қазақстан Республикасының заңнамасында көзделген талаптарды сақтау, білім беру ұйымдарының ішкі тәртіп ережелерін орындау және балалардың білім алуына қолайлы жағдай жасау қажеттілігі түсіндірілді. Діни сенім мәселелерінде дұрыс ақпарат алудың, діни сауаттылықты арттырудың және түрлі ақпарат көздерінен алынған мәліметтерге сын көзбен қараудың маңыздылығы атап өтілді.
Кездесу аясында оқу орындарында зайырлы талаптарды орындамайтын ата-аналармен профилактикалық және оңалту іс-шараларын ұйымдастыру жолдары қарастырылды. Ата-аналармен жеке және топтық түсіндіру жұмыстарын жүргізу, туындаған мәселелерді ашық диалог арқылы шешу, өзара түсіністік пен сенімді қалыптастыру мәселелеріне ерекше назар аударылды.
Спикер ата-аналарға бала тәрбиесінде отбасы мен мектептің бірлескен жұмысы маңызды рөл атқаратынын жеткізді. Баланың дүниетанымының қалыптасуына отбасы тәрбиесімен қатар білім беру ортасының да ықпалы зор екені айтылды. Осыған байланысты ата-аналардың мектеппен тығыз байланыста болуы, білім беру ұйымдарымен өзара ынтымақтастық орнатуы және балалардың құқықтары мен заңды мүдделерін құрметтеуі қажеттігі түсіндірілді.
Іс-шара барысында қатысушылар өздерін толғандырған сұрақтарын қойып, спикерден тиісті жауаптар алды. Ашық пікір алмасу арқылы ата-аналардың зайырлылық қағидаттары туралы түсініктерін кеңейтуге және білім беру ұйымдарында туындайтын мәселелердің алдын алуға бағытталған ұсыныстар айтылды.
Кездесу қорытындысында білім беру ұйымдарында зайырлылық қағидаттарын сақтау, ата-аналармен жүйелі түсіндіру және оңалту жұмыстарын жүргізу, сондай-ақ мектеп пен отбасы арасындағы ынтымақтастықты нығайту қажеттігі атап өтілді.