Жамбыл облысы, Сарысу ауданы — Арыстанды ауылында жастар арасында заң мен тәртіп қағидаттарын насихаттау және салауатты өмір салтын қалыптастыру мақсатында мини-футболдан жарыс ұйымдастырылды. Іс-шара Сарысу ауданы әкімдігі ішкі саясат бөлімінің тапсырысы аясында «Жамбыл облысы жастар ұйымдарының Қауымдастығы» ұйымдастыруымен өткізілді.
Турнирге ауыл жастарынан құралған 4 команда қатысып, шеберлігі мен жанкүйерлік рухын көрсетті. Жарыс барысы қызу бәсекеде өтіп, ойыншылар арасында достық пен адалдық рухы сақталды.
Іс-шараны тамашалауға және өз ауылдастарын қолдауға ауыл тұрғындары да белсене атсалысты — трибунада жанкүйерлер қолдау көрсетіп, спорттық шараға ерекше көңіл-күй сыйлады.
Жарыс қорытындысы бойынша барлық қатысушы командаларға бағалы сыйлықтар табысталды.
Ұйымдастырушылар мұндай спорттық іс-шаралардың ауыл жастарын құқықтық сауаттылыққа, тәртіпке және салауатты өмір салтына тартудың тиімді тәсілдерінің бірі екенін атап өтті. Осындай кездесулер аймақ ауылдары бойынша жалғасын таппақ.