2026 жылдың сәуір айының 13 жұлдызында «Ақ Сұңқар» жастар қоғамдық бірлестігінің төрағасы Әбдиев Еркін ұйымдастыруымен Жамбыл политехникалық жоғары колледжінде BIRGEMIZ: ASYL MURA жобасы аясында ақпараттық-танымдық іс-шара өткізілді. Іс-шараның негізгі мақсаты – жастар арасында волонтерлік мәдениетті қалыптастыру, тарихи-мәдени мұраны сақтау бағытындағы жұмыстарды насихаттау және студенттерді қоғамдық пайдалы қызметке тарту болды.
Шара барысында білім алушыларға BIRGEMIZ: ASYL MURA жобасының негізгі бағыттары жан-жақты таныстырылды. Атап айтқанда, тарихи-мәдени ескерткіштерді қорғау, ұлттық құндылықтарды дәріптеу, қоғамдық бастамаларға белсенді қатысу және еріктілік қызметтің қоғамдағы маңызы жөнінде кеңінен түсіндіру жұмыстары жүргізілді.
Іс-шараға арнайы спикер ретінде «Жамбыл облысы жастар ұйымдарының Қауымдастығы» ЗТБ президенті Намелбек Азамат қатысып, студенттермен мазмұнды кездесу өткізді. Кездесу барысында жастардың азаматтық белсенділігін арттыру, олардың қоғам алдындағы жауапкершілігін қалыптастыру және волонтерлік қызметтің жеке тұлғалық дамуға тигізетін оң әсері туралы маңызды ойлар айтылды.
Нәтижесінде колледж студенттері волонтерлік қозғалысқа ерекше қызығушылық танытып, алдағы уақытта өткізілетін қайырымдылық акциялары, экологиялық сенбіліктер, тарихи-мәдени мұра нысандарын қорғау және әлеуметтік жобаларға қатысуға ниет білдірді.
Аталған іс-шара жастардың бойында отансүйгіштік, мейірімділік, жанашырлық, ұйымшылдық және көшбасшылық қасиеттерді нығайтуға бағытталды.
