Ағымдағы жылдың 15 маусым күні «Ақ Сұңқар» жастар қоғамдық бірлестігі ұйымдастыруымен Тараз қаласындағы «Зият» жекеменшік мектебінде жастар арасында төтенше жағдайлар кезіндегі волонтерлік қызметтің рөлі мен маңызын түсіндіруге арналған OpenTalks форматындағы кездесу өтті.
Іс-шараның басты мақсаты – жастардың төтенше жағдайлар кезінде еріктілік қызметке қатысу мүмкіндіктері туралы ақпараттандыру, олардың азаматтық жауапкершілігін арттыру және қоғамдық қауіпсіздік саласындағы білімдерін жетілдіру болды. Кездесуге әртүрлі білім беру ұйымдарының білім алушылары мен белсенді жастар қатысып, мамандардың тәжірибесімен танысуға мүмкіндік алды.
Кездесудің арнайы қонақтары ретінде «Ұлттық волонтерлік желі» заңды тұлғалар бірлестігінің сертификатталған тренері Намелбек Азамат Намелбекұлы және «Қызыл Ай» қоғамы Жамбыл облыстық филиалының алғашқы көмек көрсету жөніндегі нұсқаушысы Бакеева Қазына Бахтиярқызы шақырылды. Спикерлер жастармен өз тәжірибелерімен бөлісіп, төтенше жағдайлар кезіндегі волонтерлердің қызметі туралы жан-жақты ақпарат ұсынды.
Кездесу барысында табиғи апаттар, су тасқыны, өрт, жер сілкінісі және басқа да төтенше жағдайлар орын алған кезде волонтерлердің қоғам үшін атқаратын маңызды рөлі ерекше атап өтілді. Спикерлердің айтуынша, еріктілер төтенше жағдайлардың салдарын азайтуға, зардап шеккен тұрғындарға алғашқы көмек көрсетуге, гуманитарлық көмекті ұйымдастыруға және ақпараттық қолдау көрсетуге белсенді қатысады. Сонымен қатар, волонтерлердің кәсіби мамандармен және мемлекеттік органдармен бірлесе жұмыс істеуі төтенше жағдайларды тиімді еңсеруге ықпал етеді.
Намелбек Азамат Намелбекұлы өз сөзінде волонтерлік қызметтің тек көмек көрсету ғана емес, сонымен қатар көшбасшылық қасиеттерді дамытуға, жауапкершілік пен ұйымшылдықты қалыптастыруға мүмкіндік беретінін атап өтті. Оның айтуынша, төтенше жағдайлар кезінде еріктілердің әрекеті нақты жоспарға сәйкес жүзеге асырылып, олардың қауіпсіздігі әрдайым басты назарда болуы қажет.
Алғашқы көмек көрсету жөніндегі нұсқаушы Бакеева Қазына Бахтиярқызы қатысушыларға төтенше жағдайлар кезінде адам өмірін сақтап қалуда алғашқы көмектің маңызы туралы кеңінен түсіндірді. Ол жастарға зардап шеккен адамға көмек көрсету кезінде сақталуы тиіс негізгі қағидаларды таныстырып, қауіпсіздік ережелерін сақтау қажеттігін ерекше атап өтті. Сонымен қатар, алғашқы көмек көрсетудің қарапайым тәсілдері мен шұғыл жағдайларда әрекет ету алгоритмдері туралы пайдалы ақпарат берілді.
Кездесу барысында волонтерлердің қызметін ұйымдастыру кезіндегі негізгі қағидалар, жауапты мемлекеттік органдармен өзара іс-қимыл жасау тәртібі және төтенше жағдай аймақтарында жұмыс істеу ерекшеліктері кеңінен талқыланды. Спикерлер еріктілердің өз бетінше әрекет етпеуі, барлық жұмыстарды үйлестіруші мекемелердің нұсқауына сәйкес жүргізуі қажеттігін түсіндірді. Бұл тәртіп төтенше жағдайлар кезінде қауіпсіздікті қамтамасыз етуге және көмектің тиімді ұйымдастырылуына мүмкіндік береді.
Іс-шара интерактивті форматта өтіп, жастар өздерін қызықтырған сұрақтарын қойып, нақты жауаптар алды. Қатысушылар төтенше жағдайлар кезіндегі психологиялық дайындық, еріктілерді оқыту бағдарламалары және волонтерлік қызметке қатысу жолдары туралы ақпараттарға ерекше қызығушылық танытты. Мұндай ашық пікір алмасу жастардың қоғамдық белсенділігін арттырып, еріктілік қозғалысына деген қызығушылығын күшейте түсті.
Бүгінде волонтерлік қызмет қоғамның тұрақты дамуы мен азаматтық жауапкершілікті қалыптастырудың маңызды құралдарының біріне айналып отыр. Әсіресе төтенше жағдайлар кезінде еріктілердің көмегі халыққа жедел қолдау көрсетуде үлкен маңызға ие. Сондықтан жастарды волонтерлік қызметке тарту, олардың білімін жетілдіру және тәжірибесін арттыру бағытындағы осындай кездесулердің маңызы зор.
Іс-шара соңында қатысушылар спикерлерге алғыстарын білдіріп, алған ақпараттарының болашақта өздеріне пайдалы болатынын атап өтті. Ұйымдастырушылар мұндай танымдық кездесулер жастар арасында азаматтық белсенділікті арттыруға, волонтерлік мәдениетті дамытуға және төтенше жағдайларға дайындық деңгейін көтеруге бағытталған жұмыстардың жалғасатынын жеткізді.
